Куспак
Кижи ону эскербейн чурттап чоруур –
Кижи куспаа чанывыста кады чоруур.
Анай бичии чажывыстан куспак дилеп
Аңаа аажок, эргеленип чаңчыгар бис.
Чөвээвисти оожуп чыттап, алаактырар,
Чөргээвисти эде шарып, оожум чайгаар
Ававыстың чылыг холун танып аар бис,
Авыралдыг куспаан билип амыраар бис.
Бирээ баскаш, ийи баскаш ойта дүжер,
Бирги базым шенеп турган хүнүвүсте,
Холун сунуп, "охалаай" деп бисти уткуур,
Хойну чылыг, ачаң куспаа омакшыдар.
Эге классче киргениңде, кежээниң-не,
Эки демдек бөгүн алдым! Көрүңер! - деп
Албан-биле көөргеттинип келириңге,
Алган демдээң үнелээни, чылыг куспак.
Аттестатты холга тудуп доозуп үнгеш,
Амыдырал делгем оруун шилип алгаш,
Аъттаныптар үе-шагың чедип кээрде,
Ававыстың куспаа бисти салыксавас.
Эптиг-демниг, эки-бакты деңге чүктээн,
Эштиң-өөрнүң найыралдыг куспактары
Эскен шайын сенче сунуп, уткуп алыр,
Эргим ынааң куспаа база немежип кээр.
Ажы-төлдүг апаргаштың, ында-хаая,
Ажыл-иштен чайлыг өйде чанып кээрге
Сыгыгларлыг холу-биле чыыра тудар,
Сымыранып, эргеледир аваң куспаа.
Мерген угаан чедип алган назыныңда
Менди сөстүг, арга-сүме айтырып кээр,
Уругларың кедергей-ле чай чок өйде,
Уйнуктарың куспаа сени чылыктырар.
Эргинивис ажып кел-ле каткы-хөглүг,
Экиилежип, мендилежир, байырлажыр,
Эргелелди, ынакшылды, хүндүткелди,
Эвилеңни дамчыдыптар дыңзыг куспак.
Кижи ону эскербейн чурттап чоруур –
Кижи куспаа чанывыста кады чоруур.
Уткуур, үдээр, алаактырып, чассыдарда
Улус-чонну чоогадыптар изиг куспак.
Ооржак
